La BAW – Bolzano Art Weeks ó ti pité na lerch ala scena artistica contemporana plëna de varieté tl Südtirol. Chësc ann é dötes les mostres sot le moto play_ground: Te proiec singui y coletifs vëgnel tematisé l'importanza dl jüch sciöche forma primara y importanta dla conescënza dl monn.
Ince la Biblioteca provinziala Dr. Friedrich Teßmann devënta na lerch d'esperiënza por l'ert contemporana:
Elisa Cappellari é öna dles 5 artistes y artisć che á davagné cun süa opera „GIOCA PURE, GIOCATE!“ le Concurs Bolzano Art Weeks. Les sis fotografies fates jö sön n das é le resultat de na vijita dl'artista a na botëga de papagai. Le patüc da fá la blëita di vicí é deventé n oget por l'analisa dl conzet dl'aurela cörta y n elemënt por la revalutaziun dla condiziun dla porsona lëdia.
Elisa Cappellari (1993) é na fotografa brasiliana che vir y laora tl Südtirol. Do so stüde d'ert y fotografia ala KABK Royal Academy of Art a Den Haag éra gnüda zoruch tl Südtirol, olache ara se dá jö sëgn cun le raiun tres la fotografia y fej inrescides visuales sön l'identité dla generaziun jona.
La daurida dla mostra é en sabeda, ai 30 de setëmber dales 10:00 tl salf de letöra dla Biblioteca provinziala Dr. Friedrich Teßmann.
La lia MAGARI interpretëia cun "Leaving the book corner“ le format dla "biblioteca ambulanta“ y mostra na cerna de publicaziuns sön le tema "discriminaziun“, che vëgn ampliada cun i libri dla biblioteca provinziala.
La lia MAGARI ó cherié punc de incuntada por le barat dl savëi y formes dl'organisaziun culturala y dl'esperimentaziun, olache an pó partí esperiënzes, desfarënzies y dejiders.
Na manifestaziun dla Biblioteca provinziala “Dr. Friedrich Teßmann” y de Bolzano Art Weeks.