Ti ultimi 40 ani se à i juesc digitei tramudà dal passatëmp tecnich ala moda che i fova n iede a na forma de massmedia. A vester che chisc juesc ne ie per si natura nia mé i prodoc ma nce i produzënc de nosta cultura. “Tres chisc juesc mparons ënghe a cunëscer nosc mond”, tlarësc Eugen Pfister, che ie a cë dl proiet de nrescida Horror-Game-Politics tla Università d’ert a Bern. “I juesc ie a chësta maniera l motor de descursc populer-culturei che i porta ativamënter pro a nfluenzé.“ Particulermënter tler devënta chësc pra i juesc che à n sofonz storich.

Eugen Pfister à studià storia y scienzes politiches tla universiteies de Viena y Paris IV y l se à laureà te storia y comunicazion politica tla Università Johann-Wolfgang-Goethe a Frankfurt am Main y tla Università degli studi di Trento. L ie cumëmber fundadëur y de cunsëi dla grupa de lëur “Geschichtswissenschaft und Digitale Spiele” (gespielt.hypotheses.org).