La Biblioteca provinziala tol pert ai Monns di libri 2016 cun chëstes scomenciadies:

• Ara arjigna indô ite l'audio-bar, olache al vëgn metü fora passa 200 libri auditifs premiá tratan le 2015 por mitans y mituns, jones y jogn y porsones adultes che é gnüs chiris fora deboriada cun l'ofize linguistich dl Südtiroler Kulturinstitut. Sambëgn n'ési nia ma da odëi tl audio-bar, mo bëgn ince da aldí: pro vigni liber auditif él ejëmpli de toc da podëi aldí, indöt sura 200 ores.
• Bele por le terzo iade ti vëgnel presenté a che che vá a ti ciaré ai Monns di libri na cerna de libri che é gnüs premiá dl 2015 da na iuria de comëmbri esperc y independënc cun pesć desvalis: operes importantes dl'ert dl baié, dl’intermediaziun interessanta dl savëi y di valurs o scemplamënter ma operes plajores por dötes les porsones che lí ion.
• La Biblioteca provinziala mët implü ciamó en mostra na cerna fora de so inventar: ara se trata de publicaziuns nöies dl ann 2015 dl raiun todësch. Al vëgn pité na impresciun generala dl'oferta ampla d'atualité di ciamps "Storia dla cultura", "Natöra y contrada", "Sozieté" y "Leteratöra y lingaz".
• Foradechël tol la Biblioteca provinziala ince pert al De dla leteratöra dl Tirol dl Nord, dl Ost y dl Südtirol (Nord-Süd-Ost-Tiroler Literaturtag) che vëgn tigní ai 23 de jená dl 2016 tl foyer dessura dl Waltherhaus.

BücherWelten: Ciasa dla cultura Walther von der Vogelweide, Schlernstraße 1, Balsan
Daurida ai 14.01.2016, dales 18:00.
BücherWelten: 15.01.2016 – 03.02.2016, lö – sa dales 09:00 – 18:00.