L pitëur y scultëur Michael Pacher (za. 1435–1498) tol ite na posizion particulera tla storia dl’ert europeica. Da una pert vën si gran auteresc a eles – sciche chël de Sankt Wolfgang pra l lech de Sankt Wolfgang tl Oberösterreich – cunscidrei lëures de ezelënza dl gotich tardif. Dal’autra pert possa Pacher nce unì cunscidrà coche un di prim artisć dl renascimënt dl nord. N ucajion de na permanënza a Padua da jëunn àl mparà a cunëscer l’operes de Mantegna, Donatello, Uccello y Lippi. Sciche degun auter artist dedora dala Talia se àl fat siei i cunzec nueves dla pruspetiva zentrela dl cheder. La tenscion danter i poi geografics y stilistics fej si lëures nteressanc, ma la à nce gaujà problems che l artist à cialà de ressolver cun soluzions scialdi inuvatives.
Lukas Madersbacher prejentea cun tesć y imajes l’opera cumplessiva de Michael Pacher y fej n resumé dla nrescida nchin ncuei. Tres l’analisa di lëures cëlel nce de ti ruvé daujin al profil nteletuel dl artist che à vivù sun l lim dl renascimënt.

Presentazion dl liber: “Michael Pacher” dl Univ.-Prof. Dr. Lukas Madersbacher (Università de Dispruch)
Ntroduzion: PD Dr. Leo Andergassen (storich dl’ert)

Na scumenciadiva dla Biblioteca Provinziela Dr. Friedrich Teßmann n cunlaurazion cun l editor Athesia.