Inće chësc ann arjigna indô ite la Biblioteca Provinziala Dr. Friedrich Teßmann l'AudioBar tl cheder dla mostra „Bücherwelten im Waltherhaus“.
Al é gnü chirì fora deboriada cun l'ofize linguistich dl Südtiroler Kulturinstitut plü co 250 libri auditifs por mituns y mitans, jogn y jones y porsones adultes premià tl 2014. Sambëgn n'ési nia ma da odëi, mo bëgn inće da aldì tl AudioBar: pro vigni liber auditif él ejëmpli de tòć da podëi aldì, indöt sura 200 ores. I libri auditifs premià por porsones adultes fej pert dl inventar dla Biblioteca Provinziala Dr. Friedrich Teßmann, chi por mituns y mitans é gnüs cumprà dal Ofize Biblioteches y letöra, y metüs a desposiziun dl AudioBar.

Bele por le secundo iade ti vëgnel en chësc ann presentè a che che va a ti ćiarè ai monns di libri tl Waltherhaus na cerna de libri che é gnüs premià dl 2014 da na iuria de comëmbri esperć y independënć cun i pesć plü desvalis: operes importantes dl'ert dl baié, dl’intermediaziun interessanta dl savëi y di valurs o scemplamënter ma operes plajores por dötes les porsones che lî ion.
An po s’imprestè fora chisc libri tla Biblioteca Provinziala do la mostra di libri.

Balsan, Kulturhaus Walther von der Vogelweide
Daurida dla mostra: ai 16 de jenà dl 2015 dales 18.00;
Orars de daurida: dai 17 de jenà dl 2015 ai 11 de forà dl 2015, dal lönesc ala sabeda dales 9.00 ales 18.00.