La biblioteca online dl Südtirol Biblio24 é da atira inant daverta a dötes les leturies y a düć i leturs dles biblioteches coliades ala tessera unica dles biblioteches dl Südtirol. 

Biblio24 é gnüda metüda sö dala Biblioteca Provinziala Dr. Friedrich Teßmann deboriada cun la Fondaziun Cassa dl Sparagn dl 2010 y é stada ćina śëgn daverta a leturies y leturs dla biblioteca provinziala. Do le suzès dla fasa sperimentala y cun le sostëgn dla Repartiziun Cultura todëscia saràra śëgn daverta a n publich plü ampl. Cun chësc vëgn l’oferta dles biblioteches publiches ampliada de cotan. La biblioteca online dl Südtirol Biblio24 rapresentëia indô n vare inant tl vers dla realisaziun dla „Biblioteca Südtirol“.

Bele śëgn él tröpes biblioteches dl Südtirol coliades ala tessera unica dles biblioteches dl Südtirol y le numer crësc tres indô. Che che s’anüza de chëstes biblioteches à n gran vantaje: cun na tessera sóra vara da s’imprestè fora media te n gröm de biblioteches dl Südtirol.
Da atira inant él ćiamò n vantaje implü: an ti po pormez debann ala biblioteca online dl Südtirol Biblio24.

Biblio24 à media eletronics che po gnì dećiarià debann y cun comodité 24 ores sön 24. L’imprëst vëgn a s’al dè online tres le computer o l’app d’imprëst diretamënter dal smartphone o dal tablet. I dać po inće gnì reportà sön n injin mobil (MP3-player, e-book-reader), sc’an à la lizënza aladô. Al vëgn dè automaticamënter n terminn d’imprëst. Do ch’al é passè le tëmp d’imprëst ne n’àn plü degun dërt d’azès. An ne mëss nia portè derevers i media y insciö ne vëgnel nia a s’al dè cosć d’amoniziun.

Le numer di media eletronics (e-book, e-audio, e-musik, e-video y e-paper) vëgn amplié tres fora.

An po se scrì ite sön www.biblio24.it cun la sigla dla biblioteca, le numer dla tessera dla biblioteca y la password.

En gaujiun dl dé dles biblioteches tol la biblioteca provinziala l’ocajiun da informè leturies y leturs che à interès sön Biblio24, ti fà conësce l’oferta nöia y ti pité n bun cafè, brioches frësches y folieć pormò stampà.

Can: en sabeda, ai 26 d’otober dl 2013 dales 9.00 ales 13.00
Olâ: Biblioteca Provinziala Dr. Friedrich Teßmann, str. A.-Diaz 8, Balsan