Nience l ann 2012 resta zenza paroles. Al vegn endò chirì la parola y la parolata dl ann 2012. Propostes te duc trei i lingac pò vegnì fates fina ai 31 de dezember.

Vertrauenskrise, indignato y Ursus ladinicus – chestes trei paroles todescia, taliana y ladina é stedes sintomatiches per cie che à fat rejoné l Südtirol tl 2011. A les paroles Treuhandgesellschaft, «indennità» y Fondo Brancher ti à la juria endere sourandé l titul puech laudatif de «parolates».

Sen scomencia l’archirida endò: cie paroles – magari ciamò dldut nueves – à pa caraterisé l 2012? Y ciunes é pa puech garatedes, prova da abelì o da ascone la realté, o ne porta nia respet per les persones y é perchel candidates per la «parolata» dl ann?
Vigni parola conta! Chest é l apel di organisadours dla scomenciadiva «Parola y parolata dl ann 2012 tl Südtirol».

Chi che à propostes da dé ju, pò l fé dret saurì sun la plata internet http://www.wopapa.it/de/wopapa/default.html o con la posta al Südtiroler Kulturinstitut, Schlernstraße 1, 39100 Bulsan. Ence la biblioteca provinziala Dr. Friedrich Teßmann tòl su propostes.

L’azion dla «parola dl ann» vegn metuda a jì dal Post linguistich dl Istitut cultural dl Südtirol, dal Istitut per Comunicazion Spezialistica y Plurilinguism dl’ EURAC, dla Facolté de Scienzes dla Formazion dla Université Ledia de Bulsan y dala Biblioteca provinziala Dr. Friedrich Teßmann.

De jené 2013 saràl spo na juria che chier fora anter dutes les propostes rovedes ite les «paroles» y «parolates dl ann» per vigni lingaz.