La biblioteca provinziala Dr. Friedrich Teßmann Ves inviëia deboriada cun la ćiasa edituria Folio y Literatur Lana ala letöra dl’auturia Roberta Dapunt, che liarà ai 27 de merz fora de so liber de poesies „Nauz“ che é gnü publiché da Folio. Alma Vallazza à fat la traduziun dles poesies dal ladin al todësch.

Roberta Dapunt é nasciüda dl 1970 a Badia, olache ara vir adöm cun süa familia. Ara à bele publiché de plü libri de poesies, l’ultimo de chisc dal titul „La terra piú del paradiso“ (2008).

„Nauz é na racoiüda de poesies y fotografies a blanch y fosch, dedicada ala vita da paur tla Val Badia. Por la poetëssa y paura Roberta Dapunt é „Nauz le simbol dla vita da vigni dé tratan l’ann.
Les imajes penetrantes y crödies dl tó ia le porcel mostra n gran respet por chësc avenimënt y vëgn intreciades cun reflesciuns y tesć de livel poetich alt sön la natöra, le laûr da paur, la vijinanza cun i tiers, i monns alpins feter desmentià y döta la creaziun. Insciö mostra Roberta Dapunt l’at dl copè, che la sozieté n’ô nia odëi, sciöche n avenimënt dla tradiziun che é bele da vedlamënter incà na pert importanta dla suraviënza da paur.

Letöra dl’auturia: Roberta Dapunt lî fora de so liber de poesies nü „Nauz“
Discusciun: Roberta Dapunt, Alma Vallazza (traduturia) y Christine Vescoli (Literatur Lana)
Can: en mertesc, ai 27 de merz dl 2012 dales 20.00
Olâ: Biblioteca provinziala Dr. Friedrich Teßmann, str. A.-Diaz. 8, Balsan