Le liber „Die Macht der Städte“ tol ite i referać che é gnüs metüs a jì dl 2007/2008 dal Istitut de storia dl’Université de Hildesheim en colaboraziun cun d’atres istituziuns de Hildesheim y Hannover. Le volum vëgn presentè da so editur, le professur universitar Michael Gehler, ai 19 d’aurì dl 2011 tla Biblioteca provinziala Dr. Friedrich Teßmann.
Gehler mostra sö ći che à influenzè le podëi y la posiziun de na cité te süa arpizada y te süa detomada, cai che é i avenimënć che à amplié l’influs dl podëi dles singoles citês o che les à sburlades zoruch tla mesaria. Al ti va inće do ala domanda de ći perspetives che la cité â sciöche raiun de vita y podëi, pian ia dala antichité ćina al dedaincö.
Dedô presentëia le dozënt universitar Hans Heiss so referat che é da ciafè tl volum „Bozen – Europäische Stadt der Übergänge“. Dî denant che le Südtirol passass sot la Talia ê Balsan na cité importanta por le passaje danter nord y süd y ara â pian ia dal eté mesana tardia na funziun de mediaziun importanta. Apajaziun y indurimënt é dui contrassëgns de basa de Balsan y süa misciun de mediaziun danter raiuns dles Alpes y dla cité, danter cultures y grups linguistics, é tres indô sön le banch de proa. Le referat pëia ite n valgügn modì de svilup de basa dla cité y agüza l’odüda sön continuitês a dorada lungia.
L’introduziun vëgn fata dal storich Hannes Obermair, diretur dl archif de Balsan.

Presentaziun dl liber: „Die Macht der Städte“, dè fora da Michael Gehler en colaboraziun cun Imke Scharlemann, Hildesheim – Zürich – New York: Olms, 2010
Referënt: Univ.-Prof. Michael Gehler, surastant dl Istitut de storia dla „Stiftung Universität Hildesheim“ y Univ.-Doz. Hans Heiss, dozënt inćiarié dla Université de Desproch y dla Université de Hildesheim
Can: en mertesc, ai 19 d’aurì dl 2011, dales 8 da sëra
Olâ: tla Biblioteca provinziala Dr. Friedrich Teßmann, str. Armando Diaz 8, Balsan