Nce chëst ann vëniel cris te Südtirol la paroles y la melesprescions dl ann te duta la trëi rujenedes dla provinzia. Y per l prim iede vëniel nce cris l dit dl ann.

Bertold Brecht ova scrit te una de si operes che la paroles ie la manties cun chëles che n possa muever la cosses. La paroles possa defati “desmuever” y “cumuever”. Uni ann iel d’autra paroles che se tira adalerch nosta atenzion. N iede fovel l stuep fin, pona l referendum, la limitazion de mandat, l crot, la badanta y nsci inant. Ciuna paroles à pa caraterisà tl 2010 la descuscions te nosta provinzia?
Datrai sambën ie la paroles melgaratedes, les ne ie nia adatedes, ie eufemistisches zënza che l fossa debujën, ngianëntes o nchinamei desprijëntes – a uni moda propi de drë “Unwörter” o esprescions tofres. Ciuna paroles Ve à pa plu tucà te chëst ann 2010?

Ora che la paroles y la esprescions tofres dl ann vëniel nce cris l dit dl ann. L possa vester na zitazion che à caraterisà l’atmosfera de n ann o l titul de na zaita che à dat tl uedl, o povester nce na detlarazion che à fat cialé ca a na maniera particulera la populazion de Südtirol.
La prupostes per la parola, l’esprescion tofra y l dit dl ann possa unì prejentedes zënza dé na mutivazion per la vela fata. Ma mpò possa na pitla spligazion datrai vester n aiut per la giuria iust n cont dl dit dl ann.

Ala nrescida dla parola, dla esprescion tofra y dl dit dl ann 2010 te Südtirol tòlel pert chësta istituzions: la purtela linguistica dl Südtiroler Kulturinstitut, la Eurac, l’Università liedia de Bulsan, la Biblioteca Dr. Friedrich Teßmann y la Biblioteca Provinciale Italiana Claudia Augusta.

La prupostes tla rujenedes ladina, taliana y tudëscia possa unì mandedes ite nchin ai 31 de dezëmber a sprache@kulturinstitut.org o lascedes te chësta lueges d’abineda: Biblioteca Dr. Friedrich Teßmann (Bulsan), Biblioteches universiteres de Bulsan y Persenon, Eurac (Bulsan) y Biblioteca Provinciale Italiana Claudia Augusta (Bulsan).

La prupostes mandedes ite unirà valutedes da na giuria aposta che chirerà ora la paroles danter chësta prupostes, l’esprescions tofres y l dit dl ann. I resultac unirà fac al savëi ntëur la metà de jené 2011.