MANUELA KERER á studié composiziun y vidora tl Conservatore dl Land Tirol y á surapró ince stlüt jö i stüdi de dërt y psicologia tl’Université da Desproch. Ara á scrit operes por le Solistenensemble Kaleidoskop Berlin, le Klangforum Wien, die reihe, la Bayerische Kammerphilharmonie o por artisć ezezionai sciöche Julius Berger y Maja Ratkje. Sües operes é gnüdes presentades da festivals sciöche la Münchener Biennale für zeitgenössisches Musiktheater y Wien Modern y te ciases de conzerc sura döt le monn. Manuela Kerer á podü pié do de plü pesć, danterater le Pest Walther von der Vogelweide (2009), le SKE Publicity Preis (2011) y le Österreichische Staatsstipendium für Komposition (2008, 2011 y 2016). Dl 2009 é la componista gnüda chirida fora sciöche öna di 100 “young creative talents” (talënc creatifs jogn) a livel europeich. Dal 2010 al 2020 ára scrit vigni edema la corona “Kerers Saite” tl foliet “Dolomiten”. Les operes dla Kerer é gnüdes publicades dala ciasa edituria Breitkopf & Härtel. Ares é gnüdes tutes sö sön tröc CDs, n CD-portait é gnü fora tl cheder dla ediziun dl ORF “Zeitton”.

 
Foto: Ingrid Heiss

FERRUCCIO DELLE CAVE á studié germanistica, storia, romanistica y sciënzes musicales a Tübingen y Desproch y é sté por tröc agn alalungia diretur scolastich y responsabl dl setur leteratöra dl Südtiroler Künstlerbund. Sciöche critich de leteratöra, teater y musiga scriel por media nazionai y internazionai y á publiché de plü libri y scrit tröc contribuc por revistes.

MI, 31.03.2021, dales 11:00 inant ONLINE!

L’incuntada cun i auturs é gnüda tuta sö tl FritzCube, le Videolab dla Biblioteca provinziala Dr. F. Teßmann y vëgn publiché ai 31.03.21 dales 11:00 sön le canal YouTube y la plata web dla Biblioteca provinziala www.tessmann.it .