La spartiziun dl Tirol dal 1918 inant ne se lascia nia despartí dala Pröma vera mondiala y da so decurs. Deache canche da d'altonn dl 1918 gnôl stlüt jö l'armistize danter la Talia y l'Austria-Ungaria, scomenciâl n prozes nü y dramatich por le Tirol tratan chël che al gnô trat n confin de stat nü danter la pert a nord y chëra a süd dl teritore.
Chësc liber ti vá do ai prozesc desfarënc y complesc di agn dal 1918 cina 1922. Tl cheder dla storia diplomatica classica vëgnel ince jü ite sön i aspec soziai, economics, de storia dla mentalité liá dla spartiziun dl Tirol. Tl cheder dla gran storia cunta i auturs dl destin di maestri, di funzionars, di lauranc y di paurs dl Tirol. Tröc documënc, lëtres y fotografies fej indô gní via süa storia.

Dr. Stefan Wedrac, storich tla Österreichische Akademie der Wissenschaften. Al se dá jö dantadöt cun la storia dla monarchia asburgica tardia, la storia dla Talia y di talians tl'Austria-Ungaria, la Pröma vera mondiala y la storia dl dërt y dla iustizia 1918 - 1945.

Mag. Marion Dotter, stüde de storia y germanistica tl'Université de Viena. Stipendium Pro Scientia 2015/16.

Discusciun y moderaziun: Prof. Georg Grote, Associate Professor for Western European History am University College Dublin, Senior Researcher tl'EURAC Istitut sön i dërc dles mendranzes a Balsan

Na manifestaziun dla Biblioteca provinziala Dr. Friedrich Teßmann y dla ciasa edituria Athesia.

dales 20:00