Le movimënt ti fej bun al corp – y al lingaz! N viadú é tl pröm naota ma bun da comuniché cun movimënc dl corp, cun i brac, les iames, cun moti y müses. Bel plan descürel spo le lingaz por denominé les cosses, dé da capí sü bojëgns y cherié relaziuns. Mo süa vëia da se möie se mantëgn y ara vá saurí da l’adoré por svilupé inant le lingaz. Tres jüc de movimënt vára da descedé la ligrëza da baié di mituns y dles mitans o da mioré te na manira mirada düc i ciamps dl lingaz dala pronunzia y gramatica cina al lessich. Y chësc ne vára nia ma da fá pro i mituns y les mitans, i jogn y les jones, mo ince pro porsones de vigni eté. Ince tl caje de porsones adultes cun na biografia de migraziun che mëss imparé n lingaz nü, á le svilup dl lingaz tres le movimënt porté de bogn resultac.

Te so referat spliga la Prof. Dr. Renate Zimmer ciodí che lingaz y movimënt toca tan adöm y cun ejëmpli concrec desmostrera che ara vá da s’anuzé de chësc por mioré les competënzes linguistiches a dötes les etés.

Prof. Dr. Renate Zimmer é na pedagoga spezialisada tla “pröma infanzia” y na professuria de sciënzes dl sport y dl movimënt tl’Université de Osnabrück. Cina dl 2018 éra stada direturia dl Niedersächsisches Institut für Frühkindliche Bildung und Entwicklung - nifbe (Istitut de formaziun dla pröma infanzia tla Sassonia bassa) y ara á fondé y manajëia l’Istitut “Bewegte Kindheit” (Infanzia en movimënt). Ara á scrit plü de 50 libri spezialisá sön le sostëgn dl svilup di mituns y dles mitans, la formaziun tla pröma infanzia, l’aprendimënt en movimënt, l’educaziun al movimënt, la psicomotorica, le lingaz y le movimënt sciöche ince la perzeziun sensitiva che é gnüs traslatá te tröc lingac. Por so impëgn ára ciafé de plü reconescimënc, danterater l’Onoranza de mirit dla Republica federala dla Germania.

17:00 ONLINE!
Le referat vëgn tigní online sciöche webinar debann tres la plataforma Zoom. Do che an s’á scrit ite tres e-mail a sprache(at)kulturinstitut.org ciafon le link al webinar.

Na manifestaziun dl Sorvisc linguistich dl Südtiroler Kulturinstitut en colaboraziun cun la Biblioteca provinziala Dr. Friedrich Teßmann y la Repartiziun pedagogia dla Direziun Formaziun todëscia tla ligna “Kind& Sprache” (“Mituns & lingaz”).