L'invenziun geniala dla stampa é stada revoluzionara: ara á mudé la sozieté y süa perzeziun dl monn. La storia dl lí y dl liber deura tröpes vijiuns sön monns de vita passá y svilups storics. Mo cun chësc mëssera afronté n problem: le lí lascia ma püc fostüs. Co vára pa spo da scrí na storia dl lí?
Le sföi tematich “Bücher besitzen – Bücher lesen (1750–1850)” dla revista Geschichte und Region/Storia e regione ti vá do a na ligna de domandes sön la storia dl liber y dles leturies/di leturs tl raiun alpin: che savô pa pordërt da lí dan da 200 agn? Ci material de letöra passâ pa ia la zensöra? Co rovân pa pro libri? Che êl pa che liô? Ci gnôl pa lit y co gnôl pa elaboré ci che ê gnü lit? Y nia inultima: Gnôl pa veramënter lit düc i libri che ê a ciasa sön scafa?

I editurs Michael Span y Ursula Stampfer presentëia le sföi tematich nü, stlarësc particolarités regionales y alza fora n valgönes leturies y n valgügn leturs storics cun sü libri.

MMag. Dr. Michael Span, storich y redadú scientifich a Desproch y Krems, á studié storia y sciënzes politiches a Desproch. Te süa dissertaziun dal titul “Ein Bürger unter Bauern? Michael Pfurtscheller und das Stubaital 1750–1850” y te tröc d'atri proiec desvalis s'ál dé jö dantadöt cun temesc storics regionai, en particolar cun le raiun dl Tirol. Dötaurela laorel tla Universität für Weiterbildung (Université por l'educaziun permanënta) de Krems.

Dr. Ursula Stampfer, storica, codicologa y bibliotecara, nasciüda a Balsan, stüde de storia y filologia todëscia a Desproch y a Besançon tla Francia. Dl 2008 ára stlüt jö le dotorat cun n laur sön la biblioteca de curt dl Arzidüca Maximilian III, Gran Maester dl Ordin di Ciavaliers teutonics (1558-1618). Colauraziun a y direziun de proiec de trascriziun de manoscric medievai tl Tirol dl nord y dl süd; 2017–2020 isituziun de n sorvisc por la conservaziun dl patrimone de libri tl Südtirol tla Biblioteca universitara de Balsan; dal altonn 2020 direturia dla Biblioteca diozejana de Rottenburg y dla Biblioteca dl Convit teologich Wilhelmsstift a Tübingen.

Na manifestaziun dla Biblioteca provinziala deboriada cun le grup de laur Geschichte und Region/Storia e regione.

27.05.2021, DALES 18:00 ONLINE
La manifestaziun vëgn tignida sön la plataforma Zoom. An ne mëss nia s’anunzié.