Nadia Rungger ie nasciuda a Persenon y la vën da Gherdëina. La studieia germanistica a Graz y la scrij da ani tla rujenedes tudëscia y ladina. Si stories y poesies ie unides premiedes cun de plu pesć letereres, l ultim l pest leterer Europa dl Cunsëi provinziel dl Südtirol y dl Südtiroler Künstlerbund, y cun l pest de lirica dl Südtiroler Künstlerbund y dla Vereinigte Bühnen de Bulsan. Nadia Rungger à publicà te de plu revistes cultureles, p.ej. te “LICHTUNGEN”, “Schreibkraft” y  “Kulturelemente”. Dl 2020 ie unì ora si prim liber “Das Blatt mit den Lösungen. Erzählungen und Gedichte” (Verlag A. Weger).

Tl Fritzcube dla Biblioteca provinziela Dr. Friedrich Teßmann à Nadia Rungger liet dant da chësta opra y rujenà cun Ferruccio Delle Cave de si liber, de lirica y prosa y dl scrì n generel. Nadia Rungger scota su avisa canche d’autri conta si stories y te si poesies y cunties sala da tuché avisa tematiches y motifs a na maniera che si letëures se fej marueia di chedri che la crieia y dla manieres de coche la i porta a esprescion.

 
Bild: Karin Schmuck 

FERRUCCIO DELLE CAVE à studià germanistica, storia, romanistica y scienzes de mujiga a Tübingen y Dispruch y l ie stat per truep ani diretëur de scola. L à menà l ciamp leteratura tl Südtiroler Künstlerbund. Coche critich de leteratura, teater y mujiga scrijel per i media locai y internaziunei y l à publicà na lingia de libri y articui per zaites.

JU, 10.06.2021, DALA 11:00 INTANT ONLINE!
L’ancunteda cun l’autora ie unida registreda tl FritzCube, l Videolab dla Biblioteca provinziela “Dr. F. Teßmann”, y la vën publicheda ai 10.06.21 dala 11:00 sun l canal YouTube y sun la plata web dla Biblioteca provinziela.