La Biblioteca provinziala Dr. Friedrich Teßmann y la lia di auturs y dles auturies dl Südtirol inviëia ala sesta ediziun de letöres Halbmittag. Trëi de beles sabedes de stetëmber y otober lí auturs y auturies da chiló y da foradecá tla curt dla Biblioteca provinziala Dr. Friedrich Teßmann fora de sües operes y nes lascia ciutié ite te so laur. 1/2 Mittag⁶ presentëia lirica y prosa te de plü lingac de auturies y auturs conesciüs y che se fej bel plan conësce y ti fej lerch a formac che vá sura i ciamps fora. N esperimënt che la vega incunta n cunté che se tëgn zoruch, le jüch de parores poetich incunta contignüs impegná, aziuns performatives incunta formes classiches.

Ai 4 de setëmber dessel gní ciutié ite tl intravaiamënt dl esistenzial tres na linia de letöres dër desvalies a livel linguistich y stilistich. Greta Lauer dla Ciarinzia lí fora de so roman nia ciamó publiché, olache ara critichëia cun na gran forza linguistica les strotöres familiares. Gianluca Battistel, da Balsan presentëia so roman publiché dl 2020 Abissi paralleli olache al se fej domandessön la posiziun politica te na sozieté sfenüda. Ivan Senoner da Urtijëi chir te so roman ladin da chël che ara ne vá nia da se destaché L testamënt dl lëuf sot-y surafunc de n monn tles munts.

Ai 11 de setëmber él formes interdisciplinares dla leteratöra tl zënter. La slammer che vir a Milan Eugenia Giancaspro traslatëia sü tesć melodics simultaneamënter tl lingaz di sëgns y cheriëia insciö evënc linguistics straordinars. Le duo neutro, metü adöm da Martin Troger dl Südtirol y Anna Neuwirth dla Bassa Austria, se dá jö cun la combinaziun de test y imaja y presentëia le liber publiché chësc ann [EIS] te na performance che vá sura i genre fora. Jörg Piringer da Viena se möi tl punt de incuntada dla leteratöra, dl sonn y dla poesia eletronica y tematisëia te süa performancecreatöres discursives tl raiun digital.

Ai 2 d’otober é la paladina dla lirica. Seda Tunç, che vir a Viena y é chersciüda sö tla Turchia, ti ciara avisa cun n lingaz artistich y n’odlada acorta ales travaies dla vita da vigni de te so volum de debüt WELCH, che é gnü fora dan da püch. Lilia Ianeva Satta, soprana y artista dla parora de origina bulgara che vir a Balsan toca te süa racoiüda Haiku Frutto y Bocciolo sonns amesa les dessonanzes. L’autur da Falzes Karl Tschurtschenthaler lí fora de so debüt Der Dämmrung ins Maul y chir tles gran pedies dla tradiziun les picolëzes che an n’á nia odü dl gran döt.

ABGRÜNDE & AUSWEGE - 04.09.21 - 10:00 UHR
Greta Lauer
Gianluca Battistel
Ivan Senoner

GESTEN & GEWITTER - 11.09.21 - 10:00 UHR
Eugenia Giancaspro
Neutro (Troger/Neuwirth)
Jörg Piringer

ZWEIGE & ZWEIFEL - 02.10.21 - 10:00 UHR
Seda Tunç
Lilia Ianeva Satta
Karl Tschurtschenthaler

Dla linia de letöres y de süa moderaziun se crüzia Eeva Aichner y Matthias Vieider.

SCOMENCIAMËNT: DALES 10:00 (entrada dales 09:30 inant)
Le danmisdéde letöra mët man dales 10 tla curt de letöra dla Biblioteca provinziala Dr. Friedrich Teßmann tla strada A. Diaz 8 a Balsan.
Gnide prëibel por tëmp y ora! La manifestaziun vëgn a se le dé tla curt de letöra respetan avisa les regoles sön la segurëza da sëgn - sce al é burt tëmp é la manifestaziun tl salf de letöra y al pó ma pormez n cer numer de porsones.
Resservede prëibel n post da se senté jö tres le sistem de prenotaziun sön la plata web dla biblioteca provinziala.