Percie à pa do l 1945 persones singules o grupes de persones purtà ite la  storia dla nterceda dl Südtirol cun la viera dl’Abessinia tla descuscions storiches publiches? L autor analisea chësta dumanda mustran su nsci che l ne se trata nia mé de si nteresc ndividuei, che ie da recunëscer te chësc cuntest, ma che l ie a chësta maniera n generel puscibl studië – a livel de cultura dla lecurdanza – l raport cun l passà tl raion de lecurdanza Südtirol. Perchël ti dà De Pretto na udleda al monumënt di Alpini a Burnech, ai inuemes dla stredes a Bulsan, ai libri che trata dl ncësa Südtirol, schiche nce ala cunties culetives tl tëmp do la viera, analisan dut chësc n cont de si funzion coche lueges de lecurdanza che ie tl zënter de descuscions controverses tla politica de carater culturel-naziunalistich a pe dl Prëner.

Dr. Sebastian De Pretto à studià filosofia, storia y analisa de cunflit pra la universiteies de Basel, Bologna y Heidelberg. Ël à fat l dutorat tl’Università de Luzern tla Svizra y si dissertazion ie la basa de chësc liber. Tl mumënt lëurel per l proiet “Transnationale Stauwerke im Alpenraum, 1870–1974“.