La Biblioteca provinziala Dr. Friedrich Teßmann y la Lia di auturs y dles auturies dl Südtirol inviëia bele por le setimo iade tla curt de letöra dla Teßmann. Trëi sabedes danmisdé de setëmber presentëia la ligna de letöra Halbmittag indô formes atuales de lirica, prosa y leteratöra performativa. Pro n bun gosté lí auturies y auturs conesciüs y che é tl laur da se fá conësce dla Talia, dl’Austria y dla Svizera fora de sües operes y cunta de sü scric. La varieté stilistica y linguistica y la vëia da esperimenté sot forma de jüch é tl zënter dl’ediziun da chësc ann che ti vá do al “alzé“, “trá ia y ca“ y “zupfené“ tla leteratöra.

10.9.22 „Lupfn“
Cun ci mesi che ara vá da alzé sö modí de perzeziun y pinsier normalisá, desmostra Jakob Kraner, che cheriëia cun süa pröma cosmologia publicada chësc ann n’interpretaziun nöia y dër virtuosa dla realté, y Julian Messner, che alza fora cun odüdes demorvëia la realté y la müda completamënter a na manira plajora. Ti tesć performatifs de Francesca Gironis devënta l’“alzé” leteralmënter na pert integrala dla rapresentaziun.

17.9.22 „Schupfn“
Dl trá ia y ca zënza meses parores le lingaz y le monn nen vára le secundo danmisdé. Anaïs Meier lí fora de so ultimo roman “Mit einem Fuß draußen”, che á ciafé le pest “Komische Literatur 2022”. Claus Soraperra se möi a na manira particolara tl’aventöra danter leteratöra, ert figurativa y performance. Y Anja de Falco porta dant n valgügn de sü tesć insistënc y rasanc.

24.9.22 „Zupfn“
„Zupfené“ a na moda sotida é la manira de espresciun leterara dles auturies y dl autur dl ultimo danmisdé. Katja Renzler, conesciüda por süa lirica delicata y conzisa nes lascia ciütié ite te so roman nia ciamó publiché. Claudia Polver laora te sües miniatöres liriches a na moda inovativa cun dui lingac. Matthias Vesco cunta tl roman publiché dl 2021 “Feng-Shui: Impossible” dles conseguënzes de n hobby sciöche al pe da nia.

La matineé de letöra mët man dales 10.00 (entrada: dales 9:30) tla curt de letöra dla Biblioteca provinziala Dr. Friedrich Teßmann tla strada A. Diaz 8 a Balsan.
Dla ligna de letöres y de süa moderaziun se crüzia Eeva Aichner y Matthias Vieider.
Tres le sistem de prenotaziun sön la plata web dla biblioteca provinziala pól gní resservé posć da senté.