Aladô de sciazades á 350 miliuns de porsones na depresciun. Les ëres vëgn atocades dui iadi tan gonot co i ëi. Tröpes porsones atocades ne chërda nia sö n dotur ajache ares se doda, n’ó nia l’odëi ite o ne sá nia ci fá. Tröpes de chëstes n’é porchël gnanca sigüdes sce ares á na maratia psichica. En general é la depresciun plü co ater n tema che vëgn scuté ia, porchël se fej ince la maiú pert dles porsones ert cun la maratia. Unse bele na depresciun sce i un desturbs da dormí? Da can inant é pa la plüra patologica? Y pó pa desturbs dla memorisaziun ince ester sintoms de na depresciun?
Roger Pycha lascia alsavëi te n liber publiché dan da püch cun Athesia “Depression“ so savëi y süa esperiënza sciöche psichiater y spliga l’origina de chësta maratia, al cunta dles carateristiches y di sintoms, dla cura, di aiüc y dles poscibilités de terapia.

L’incuntada cun Roger Pycha y Richard Santifaller vëgn moderada da Sabine Cagol.

Dr. Roger Pycha á stlüt jö so dotorat dl 1985 a Desproch, al á lauré danter ater sciöche dotur assistënt a Coira y pröm dotur tla clinica universitara da Desproch. Danter le 1999 y le 2018 él sté diretur dl sorvisc psichiatrich a Bornech, dal 2018 incá él diretur dl sorvisc psichiatrich a Porsenú. Al é coordinadú dl’Alianza europeica cuntra la depresciun tl Südtirol, diretur scientifich dl grup de laur por la prevenziun cuntra le suizid tl Südtirol, vizepresidënt y insegnant de terapeuc dl Istitut por l’inrescida y la terapia sistemica dl Südtirol, sciöche ince comëmber dl’organisaziun de autoaiüt de porsones cun na maratia psichica dl Südtirol “Lichtung/Girasole”.

Dr. Sabine Cagol é na psicologa diplomada, psicoterapeuta, consulënta sistemica y terapeuta, terapeuta dl’infanzia y dla jonëza, coach sistemica y supervisuria cun n so stüde a Balsan. Dal 2020 éra presidënta dla Ciamena di psicologs de Balsan.

Richard Santifaller á ti agn tres indô albü de burtes depresciuns. Intratan él da passa 8 agn stabil a livel psichich y laora cun suzes tl raiun sanitar a Porsenú. Al é tl Consëi dla Lia di familiars de porsones cun na maratia psichica “Ariadne“.

Na manifestaziun dla Biblioteca provinziala “Dr. Friedrich Teßmann” y dla Ciasa edituria Athesia-Tappeiner.

Dales 20:00 | Entrada dales 19:30 inant
Gnide prëibel por tëmp y ora! La manifestaziun vëgn tignida tl salf de letöra dla Bibiloteca provinziala, tl respet dles mosöres de segurëza varëntes, por n numer limité de porsones. Resservede n post da senté tres le sistem de prenotaziun sön la plata web dla Biblioteca provinziala!