"I n'â degun interes da scomencé val' da nü. Y gnanca la vëia da scomencé da fá valch cun me instës."

Te "Abriss" de Gerd Sulzenbacher slondernëia le naratur cun na fraidité löcra fora por Viena. Al passa fora por plazes y strëfla tres strades y cuartiers dla cité, al se lascia tomé te monologs y spo se scríel sö: "Fat n'áí nia, i ne sun sté ignó, degügn n'é gnüs a me ciafé."
Unse da nen fá chiló cun na porsona che ó lascé odëi che ara vá ion ala slondra? O cun n Bartleby tardí che invënta n'atra forma de refodanza? "I would prefer not to“, dij la figöra conesciüda de Hermann Melville, "plü ion ne oressi nia", y sciöche al pé n'él nia d'ater che sbürla l'eroe de Sulzenbacher da rodé fora por cité.
Te 66 de pici capitui ti vál do ala mascima dla negaziun y se dá al eserzize dl "se pone" sciöche proiet de vita cuntra les pretenüdes de perfezionamënt y l'otimisaziun de se instës. Forsc podesson ciafé te chësc na proteziun, pënsa le naratur dala ria. Y tratan che al se arbandonëia a n flus de parores, ti fajon aposta a döta la laboriosité dl se dé da fá se lascian jí avisa tan anarchicamënter coche al rabësc tres la cité, dessëgnel na Viena, "la cité dla snizl y di somi", sacrificada da gní trata jö olache al sparësc les lercs publiches.
I toc de prosa de Gerd Sulzenbacher é miniatöres essayistiches che eserzitëia la contradiziun sciöche manira de vita cun spirit comich, ironia y na pedanteria te chëra che ince l'introspeziun vá a finí te na comizité assurda. Süa prosa pretënn la liberté de spirit dl dejütl y plüra adascusc l'identité stabila de ogec che sparësc.

La conversaziun cun Gerd Sulzenbacher gnará tignida da Christine Vescoli (Literatur Lana)

Na manifestaziun dla Biblioteca provinziala Dr. Friedrich Teßmann y dl cërtl leterar Literatur Lana

dales 20:00