De setëmber 2025 festejea la lingia de letures 1/2 Mittag-Pandalanuef – na cooperazion danter la SAAV (la Lia Autores Südtirol) y la Biblioteca provinziela Dr. Friedrich Teßmann si 10 ani d’aniverser. Dal 2016 vëniel tla chëurt dla Biblioteca Teßmann defati sondà i svilups nueves dla leteratura cuntemporera: i ghesć ie autores sibe dl raion che da ordecà, che n cunësc ma nce de tei che ie tl lëur de se fé cunëscer.

Sota la dirijënza artistica de Eeva Aichner y Mathias Vieieder iel ti ultimi ani unì sperimentà for deplù cun cuntenuc y formes. Nsci ie tl 2022 stata tl zënter la leteratura performativa, tl 2023 la dumanda cie che possa dut vester leteratura y tl 2024 se àn dat ju cun l’atualisazion de tesć letereres storics.

Cun l’edizion dl aniverser di 10 ani arjunjerà la lingia de letures, che vën normalmënter tenida ntan trëi danmesdis, la colm cun n festival de n di ntier pra chël che l format dla letura nstës sarà tl zënter dla sperimentazion. Danter la 10:00 y la 15:00 saral mesun “viver” i tesć de 11 autores de nosc raions y da oradecà tl cheder de jites defrëntes:

La “spaziredes” cun Monika Rinck, Simone Dark y Martin Fritz nes lascia scuvierjer a na maniera nueva l ridl ntëur la Biblioteca Teßmann. Isabel Folie, Nadia Rungger, Katia Tenti, C/R Tröbinger بنت الشمس, Arno Dejaco y David Hoffmann nvieia danter l auter tl verzon dl Ufize provinziel per i Bëns Culturei a tò pert a picnics lirics. Y n percurs leterer pensà ora da Filomena Hunglinger y Matteo Jamunno ve aspieta a unì esplurà autonomamënter da vo nstësc. La chëurt de letura dla Teßmann sarà la luegia zentrela dl festival cun na ufierta de cunversazions muderedes y de bona maiadives.

1/2 Mittag – pandalanuef 10 unirà tenì cun uni tëmp. La ntreda ie liedia. Nfurmazion plu prezises sun l program.