Te so discurs conesciü che le Presidënt Macron á tigní dl 2017 tl'Université Sorbonne de Paris s'ál fat sterch por la refondaziun de "n'Europa sovrana, unida y democratica". Incö y amesa na vera europeica pél che chësta vijiun sides ciamó bindebó dalunc. Ci él pa sozedü? Ci ó pa dí sovranité? Olá é pa le sovran dla democrazia europeica? Le referat analisëia le gní indô sö de egoisms nazionai y delineëia trus da sciampé fora da chësc dilema a chël che chisc egoisms á condüt l'Uniun europeica.
Moderaziun: Brigitte Mazohl (Academia dles Sciënzes Austriaca)

Sonja Puntscher Riekmann é stada professuria de Teoria politica y Politica europeica y ince a ce dl Centre of European Union Studies tl'Université de Salzburg. Ara á insigné tles Universités de Viena, Desproch, Humboldt a Berlin, Firenze y tla LUISS a Roma. Ara á coordiné le proiet d'inrescida EU Horizon 2020 “EMU Choices” sön l'uniun economica y monetara, y á publiché por tröpes revistes y ciases edituries internazionales. Ara é comëmbra efetiva dl'Academia dles Sciënzes austriaca y dl Consëi de control dl Istitut universitar europeich a Firenze.

Na manifestaziun dla Biblioteca provinziala Dr. Friedrich Teßmann y dl'Academia dles Sciënzes austriaca.