Da en jöbia, ai 25.05.2023 inant ti podarán pormez lediamënter y debann a passa 80 foliec y revistes da döt le raiun storich dl Tirol che reverda dantadöt l'ultima pert dl 19ejim y le pröm 20ejim secul sot le link www.zeitshift.eu.
Passa 80 foliec y revistes da döt le raiun storich dl Tirol podará gní consultá por le pröm iade online y debann sön na plataforma web unica da en jöbia, ai 25 de ma dl 2023 inant. Implü jarára da chirí düc i contignüs dl portal tres n'archirida de test integrala do parores tle.
Tres na strategia de digitalisaziun che vá sura i confins fora éra jüda por le pröm iade da fá rové virtualmënter adöm sön na plataforma web unica tesć de foliec sternüs fora fisicamënter tl raiun dl Tirol storich, che vá derevers dantadöt al tert Otcënt y al pröm Nücënt. Döt chësc é sté poscibl tl cheder dl proiet "Zeit.shift - n iade digital tl dagní che é sté", n proiet interregional che vá sura i confins fora dla Bibiloteca provinziala "Dr. Friedrich Teßmann" (IT), dla Biblioteca universitara dl Land Tirol (Universitäts- und Landesbibliothek Tirol) (AT) y dl'Eurac Research (IT) por mantigní, valorisé y dé inant le patrimone de tesć cultural dl raiun dl Tirol storich.
Cun Zeit.shift vára plü saurí da ti rové pormez a fontanes de test storiches y al é plü scëmpl da fá inrescides te revistes y foliec dl tëmp passé. Tl medemo tëmp vëgnel presservé a dorada lungia le patrimone de tesć dl raiun storich dl Tirol y ciaré dles ediziuns originales che é gnüdes digitalisades integralmënter y laurades fora cun l'aiüt de metodes dla linguistica eletronica orientada ales porsones che l'anüza (sciöche por ejëmpl OCR – Optical Character Recognition y NER – Named Entity Recognition) y metüdes a desposiziun lediamënter y debann a n publich ampl te n portal online.
Les ediziuns digitalisades di foliec y dles revistes pó gní desćiariades y stampades tl respet di dërc d'autur. I resultac dles inrescides pó gní salvá tl raiun personal y pó gní cherdá jö canchessî.
Le proiet "Zeit.shift" é gnü sostigní dal Fonds Europeich de svilup regional (FESR) y dal program de cooperaziun Interreg V-A Talia-Austria 2014-2020.
