OPATCH - Open Platform for Access to and Analysis of Textual Documents of Cultural Heritage

Le proiet d’inrescida de dui agn é gnü gestí tl scomenciamënt dl 2014 cina la fin de merz dl 2016 dal Istitut de comunicaziun spezialistica y plurilinguism dl’EURAC. Al proiet á ince tut pert, dlungia l’EURAC y la Biblioteca provinziala Dr. Friedrich Teßmann, l’Istitut por Corpora linguistics y Tecnologia testuala dl’Academia Austriaca dles Sciënzes de Viena sciöche partner assozié.
Le proiet é gnü finanzié dala Repartiziun 34. Inovaziun, Inrescida y Université aladô dla l.p.14 dla Provinzia Autonoma de Balsan.

Linguisć computazionai dl’EURAC, bibliotecars dla Biblioteca provinziala Teßmann y inrescidus dl Istitut por Corpora linguistics y Tecnologia testuala dl'Academia Austriaca dles Sciënzes de Viena á ejaminé deboriada sciöche les tecnologies de linguistica computazionala, statistica y visualisaziun d’informaziun pó gní adorá y svilupá por mioré y amplié portai d’inrescida por racoiüdes de tesć. Aladô di bojëgn di utënc desvalis jôl naota debojëgn da cherié n sistem por curí düc i vari de laur: dal'estrapolaziun di dac a süa elaboraziun, cina ala presentaziun sön le portal di utënc. Tla racoiüda digitala dla Biblioteca Teßmann él bele dan man na desëna de foliec storics todësc dl raiun alpin dl tëmp che vá dal 1910 al 1920 (http://digital.tessmann.it). I dac de test integrai rapresentëia por storics, cronisć y genealogisć manires nöies da ti rové pormez ai dac y percursc d’inrescida d’öga.
Dlungia l'archif digital de foliec, él ince n portal nü por l'analisa linguistica de romans, articui de foliec o rezetes, racoiüdes tl “Korpus Südtirol” (plataforma de racoiüda, archiviaziun y elaboraziun linguistica de tesć südtirolej). Cun chësc stromënt pó i linguisć analisé ci parores che vëgn adorades sovënz y coche le lingaz se müda tl tëmp. Sön chisc stüdi él dan man de plü grafics linears y diagrams a lëgn che mostra la frecuënza d’adoranza y i contesć tipics, olache na certa parora vëgn dant. Sön chësc link vára da ti rové pormez ai dui portai d’inrescida: http://commul.eurac.edu/opatch/.


logo-provinz-bozen-bei-opatch


Cuntat Eurac:
Verena Lyding
+39 0471 055 127
verena.lyding@eurac.edu

Cuntat biblioteca provinziela Dr. Friedrich Teßmann

Johannes Andresen
+39 0471 471811
johannes.andresen@tessmann.it