Zeit.shift – n iade digital tl dagní da inier:
mantignimënt, valorisaziun y trasmisciun dl'arpejun de tesć culturala de döt le Tirol
Proiet
Le fin dl proiet é da cherié na colaboraziun istituzionala che vá sura i confins fora y che döra dî por mantigní, valorisé y dé inant l'arpejun de tesć culturala dl Tirol y dl Südtirol. I bëgns culturai scric de döt le Tirol é sternüs fora te dötes les perts dl teritore y n'é al momënt da ciafé te süa totalité te degöna istituziun. Cina ciamó é i documënc ince ma en pert digitalisá y la popolaziun ne i conësc nia assá y ne ti pó nia saurí pormez. Tres na strategia de digitalisaziun y trasmisciun che vá sura i confins fora y te na colaboraziun strënta cun la Bibiloteca provinziala Dr. Friedrich Teßmann, l’Universitäts- und Landesbibliothek Tirol (Biblioteca universitara dl Land Tirol) y l'Eurac Research vëgnel sëgn por le pröm iade fat rové virtualmënter adöm sön na plataforma web unica tesć sternüs fora tles regiuns desvalies y laurá fora cun l'aiüt de metodes dla linguistica eletronica orientada ales porsones che l'anüza. Chësc sozed cun l'ejëmpl prototipich di foliec da vigni de storics che manacia veramënter da jí dojö te süa funziun de fontanes. La priorité prinzipala dl proiet é da trá ite ativamënter la popolaziun. Bele tla fasa de proietaziun vëgn les zitadines y i zitadins cherdá y inviá da tó pert al'esploraziun di tesć tres anotaziuns online dl material testual, a na moda da sensibilisé la popolaziun sön süa arpejun culturala y la condüje plü dlungia a fontanes de tesć storiches. La plataforma web é la basa por na colaboraziun cun ciamó d'atres istituziuns bëgn sura la dorada dl proiet fora.
Partner prinzipai: Repartiziun Cultura todëscia dl'Aministraziun provinziala - Biblioteca provinziala Dr. Friedrich Teßmann
Partner: Eurac Research – Istitut de Linguistica aplicada, Université de Desproch – Universitäts- und Landesbibliothek Tirol (Biblioteca universitara dl Land Tirol)
Partner assoziá: Euregio Tirol-Südtirol-Trentino, Repartiziun Tiroler Landesarchiv der Tiroler Landesregierung (Archif dl govern dl Land Tirol), Tiroler Landesmuseen (Museums dl Land Tirol), Südtiroler Kulturinstitut (Istitut cultural dl Südtirol), Tiroler Bildungsforum (Assoziaziun por la cultura y la formaziun dl Land Tirol), Archif dla Provinzia autonoma de Balsan-Südtirol, Bibliotheksverband Südtirol (Assoziaziun biblioteches dl Südtirol)
Dorada dl proiet: otober 2020 – otober 2022
Budget: 658.000 euro (443.000 € EU, 56.000 € contribut nazional, 159.000 € mesi sü)
Fins
1. Digitalisaziun de foliec da vigni de storics dl Tirol
2. Svilup y realisaziun de na scomenciadia Citizen-Science por valorisé documënc de tesć storics tres la partezipaziun dla zitadinanza
3. Elaboraziun linguistica eletronica di digitalisac (documënc arjigná por gní dá inant eletronicamënter) por poscibilités d'inrescida y visualisaziun plü amples
4. Azes digital a döta la racoiüda de foliec da vigni de storics tl teritore dl Tirol sön na plataforma web por l'inrescida d'informaziuns, la sensibilisaziun culturala y la formaziun
Prëibel fajede para!
Zitadines y zitadins interessá vëgn inviá da tó pert al'esploraziun de tesć y colaboré ativamënter al proiet: tres la plataforma
Historypin pó tesć publizitars de foliec da vigni de storics sciöche p.ej. chi dl Tiroler Grenzboten o dl Bozner Nachrichten gní descric por ci che reverda le contignü (to tag) y geolocalisá tres Google Maps (to pin). Insciö vára da recostruí virtualmënter les strades comerziales de nosta cité dan da cënt agn y les porsones interessades á l'ocajiun da descurí mistiers da n iade che ne vëgn nia plü praticá y imparé da conësce produc y ogec che ne vëgn nia plü adorá. Implü öga le fá "pin y tag" sciöche sostëgn dl'analisa linguistica eletronica, por che les ediziuns digitales di foliec da vigni de storics pois dedô gní esplorades tres parores de chirida sciöche p.ej. profii profescionai, posć, strades y inoms de familia.
Jide ite tla varieté dles fontanes de test storiches, lascesse tó dala morvëia da ti ciaré ai foliec che nes dá vijiuns interessantes dla vita tl Tirol dan da cënt agn y fajede para al pröm proiet de Citizen-Science de chësta sort!
D'atres informaziuns:
https://all4ling.eurac.edu/de/zeitshift/
Por domandes:
zeitshift@tessmann.it